Bilang pormal na pagsisimula ng kwaresma ngayong Ash Wednesday, hinihikayat ng simbahang katolika ang mga mananampalataya na alalahanin ang kabutihan ng Diyos sa kabila ng iba’t ibang hamon sa buhay.
Sa isinagawang eucharistic celebration sa Quiapo Church kahapon, kasunod ng ritwal ng pagsusunog ng mga lumang palaspas na nabendisyunan, pinaaalalahanan ni vice rector at parochial vicar na si Fr. Marion Brian Maquiraya ang mga katoliko na hindi lamang puro pagsubok ang nararanasan sa buhay.
May mga pagkakataon anyang nararanasan ng tao ang dakilang pagmamahal ng Panginoon kaya’t mahalagang balikan ang mga ito at pagnilayan sa puso.
Ang ritwal ng pagsusunog ng mga lumang palaspas ay isinasagawa ng catholic communities sa Pilipinas bilang paghahanda sa Ash Wednesday na hudyat ng pagsisimula ng lenten season.
Gagamitin ang mga abong makukuha mula sa sinunog na palaspas sa paglalagay ng abo sa noo ng mga mananampalataya.
Samantala, pinaaalalahanan naman ni Fr. Maquiraya ang mga katoliko na sa paggunita ng kwaresma, mahalagang suriin ang sariling mga gawa at relasyon sa Diyos, at paghandaan ang pagdating ng pasko ng pagkabuhay.
