Todo-higpit ang Manila Police District (MPD) sa pagpapatupad ng seguridad sa pinakamalaking libingan sa buong Metro Manila ang Manila North Cemetery.
Ayon kay NCRPO Director Chief Superintendent Oscar Albayalde, mabusising sinusuri ang mga gamit na pumapasok sa naturang sementeryo upang maiwasan na malusot ang mga ipinagbabawal na bagay tulad ng patalim, alak at iba pa.
Kapuri-puri naman ayon kay Albayalde ang kooperasyon na ipinakikita ng publiko na matamang sumusunod sa mga ipinatutupad na alituntunin.
Sa huling tala ngayong araw, alas-8:30 ng umaga, umabot na sa 150,000 ang crowd estimate sa Manila North Cemetery na dumadalaw sa kanilang mga yumaong mahal sa buhay at inaasahang bubuhos pa ito sa buong maghapon.
Samantala, nasa higit 300 naman ang naka-deploy na Kapulisan sa nasabing sementeryo kabilang na ang mga volunteers na patuloy na nakagabay sa publiko.
By Rianne Briones | Aya Yupangco (Patrol 5)
