Mas bumaba pa ang reproduction number ng COVID-19 sa National Capital Region.
Ayon sa pinakahuling report ng OCTA Research Team, nasa 1.39 ngayong September 2 ang reproduction number na mas mababa kumpara sa 1.43 nitong huling araw ng buwan ng Agosto.
Dahil dito, sa pagtataya ng OCTA, posible pang bumaba ang maitatalang reproduction number sa rehiyon sa ikatlong linggo ngayong buwan.
Mababatid na ang reproduction number ay tumutukoy sa pupwedeng mahawaan ng isang indibidwal na positibo sa virus.
Samantala, sa kaparehong pag-aaral ng grupo, lumalabas na ang pitong lungsod sa NCR ay bumaba na ang growth rate ng virus sa single digit.
9% na lamang ang growth rate ng COVID-19 sa Muntinlupa, Malabon ay may 6%; 4% sa Quezon City; tig-3% ang lungsod ng Valenzuela at Caloocan; at 0% sa Manila at Pasay.
Sa huli, nagpaalala ang OCTA Research sa publiko na sumunod pa rin sa umiiral na health protocols kontra COVID-19.
