Inirekumenda ng Philippine National Police – Internal Affairs Service o PNP-IAS ang pagsibak sa serbisyo sa isang pulis habang pinadedemote naman ang 10 iba pa.
Ito’y makaraang masangkot ang mga tauhan ng Quezon City Police District o QCPD Special Operations Unit sa misecnounter laban sa mga tauhan ng Philippine Drug Enforcement Agency nuong isang taon.
Kinilala ni PNP-IAS Inspector General Atty. Alfegar Triambulo ang pinasisibak na pulis na si P/Cpl. Alvin Borja habang ilan sa 10 pinadedemote ay sina P/Maj. Sandie Caparroso, P/Lt. Honey Besas at P/Lt. Ronnie Ereno.
Ayon kay Triambulo, kinailangan nilang irekumenda ang pagpapasibak kay Borja dahil sa samu’t saring mga kaso ang naisampa na laban sa kaniya tulad ng homicide, attempted homicide at direct assault.
Mula sa 41 na pulis na kabilang sa madugong engkwentro, 29 ang naabswelto matapos walang makita sa kanilang ebidensya na nagpabaya ang mga ito sa tungkuin.
Tatlo ang kumpirmadong nasawi sa naturang misencounter kung saan 2 rito ay mga PDEA agents habang 3 rin ang nasugatan. —ulat mula kay Jaymark Dagala (Patrol 9)