Nanawagan ang social justice arm ng Simbahang Katolika na wakasan na ang political dynasty bilang mahalagang hakbang para matigil ang lumalalang katiwalian sa bansa.
Ayon sa Catholic Bishops Conference of the Philippines Episcopal Commission on Social Action, Justice, and Peace, mananatili ang korapsyon hangga’t hindi nahaharap ng bansa ang malalaking pamilyang dekada nang namamayani sa politika.
Iginiit pa ng komisyon ang agarang pagpasa ng anti-dynasty law upang maputol ang paglawak ng impluwensya ng mga political clan.
Samantala, hinimok ng Caritas Philippines ang publiko na huwag nang kunsintihin ang political dynasties at suportahan ang mga bagong lider na may sapat na kakayahan at integridad.
Batay sa datos ng Philippine Center for Investigative Journalism, labing-walong dinastiya ang nanalo sa halalan ngayong 2025 midterm elections, kabilang ang mga pamilyang Marcos, Romualdez, Duterte, Singson, Villar, Pacquiao, Dimaporo, Hataman-Salliman, at Tan.
Binigyang-diin ng simbahan na marami sa mga rehiyon ang kontrolado ng mga malalaking angkan at patuloy na nananatiling mahirap at hindi naaabot ng sapat na serbisyong panlipunan ang mga pinaka-apektadong komunidad.
