Sinuspendi na ng LTFRB o Land Transportation Franchising and Regulatory Board ang P&O Transport Bus matapos masangkot sa aksidente sa Maharlika Highway sa Lopez, Quezon na ikinasawi ng 4 katao at ikinasugat ng 6 na iba pa.
Inilabas ng LTFRB ang Preventive Suspension Order kasabay ng pagpapadala ng mga tauhan sa lugar para imbestigahan ang aksidente.
Maliban dito, inatasan na rin ng ahensiya ang Insurance Companies ng pampasaherong bus na magpadala ng mga tauhan sa lugar para agad na maasikaso ang kinakailangan at benipisyo ng mga biktima.
Nagpaabot na rin ng pakikiramay ang LTFRB sa mga naulilang pamilya ng mga nasawi sa aksidente na kinabibilangan ng isang mag-asawa, anak nilang babae at driver ng nabanggang van.
Batay sa ulat, binabagtas ng P&O Bus Transport ang Maharlika Highway nang banggain nito ang isang Toyota Hi Ace Van at mga nakaparadang tricycle.
