Nanindigan ang PNP o Philippine National Police na buo pa rin ang tiwala ni Pangulong Rodrigo Duterte sa kanilang pamunuan sa harap ng kaliwa’t kanang kontrobersiyang ibinabato rito.
Iyan ang inihayag ni Police B/Gen. Bernard Banac, sabay muling pagtitiyak ng kanilang kahandaang humarap sa anumang pagdinig o imbestigasyon hinggil sa umano’y pagkakasangkot ng dalawang heneral sa iligal na droga.
Sa panayam ng DWIZ kay Banac, sinabi nito na bagama’t wala pa naman silang natatanggap na impormasyon sa mga hindi pa pinapangalanang heneral, sinimulan na nila ang pagsasagawa ng background checking.
Kasunod nito, nanawagan naman ng panalangin ang PNP sa publiko gayundin ng suporta at pang-unawa kasunod na rin ng pagsubok na bumabalot ngayon sa kanilang hanay.
Tiniyak pa ni Banac sa publiko na mananatiling tapat, propesyunal at disiplinado ang hanay ng pulisya sa harap na rin ng pinaigting na kampaniya kontra droga at krimen.
“Ang pangulo ay may unlimited access to information at a higher level so maaring meron siyang nasasagap na mga impormasyon at mas maganda nga talaga kung mapanglanan narin ang mga ito katulad ng ginagawa natin sa mga narco-politicians para makita at ma-monitor na natin kung ano talaga ang posibleng pagkakasangkot ng nasabing mga heneral,” ani Banac — sa panayam ng Balitang 882