Binanatan ng Presidential Legislative Liason Office ang online news site na Rappler dahil umano sa pagpapakalat nito ng fake news o maling balita.
Ito’y makaraang ilathala ng Rappler sa artikulo nito ang hinggil sa Commission On Audit report kaugnay ng overspending umano ng PLLO na aabot sa mahigit Tatlong Bilyong Piso para ibayad sa kanilang mga consultant.
Ayon kay PLLO Secretary Adelino Sitoy, itinanggi nito ang nasabing COA report at iginiit na pawang mga kuwalipikado ang kanilang mga kinuhang legal professionals, skilled personnel at maging mula sa academe.
Buwelta pa ni Sitoy, iresponsable ang ginawang pag-uulat ng Rappler dahil inilathala aniya ang naturang artikulo nang hindi man lamang kinukuha ang panig ng ahensya.
