Handang irekomenda ng Eastern Police District (EPD) ang pagpapasara sa Icon Clinic kung saan nasawi ang isang 29-anyos na businesswoman makaraang sumailalim sa cosmetic surgery.
Ayon kay Chief Supt. Romulo Sapitula, hepe ng Eastern Police District, depende ito sa kalalabasan ng kanilang imbestigasyon.
Gayunman, kung sasabayan anya ng lokal na pamahalaan ang kanilang imbestigasyon at magkakita ng sapat na basehan ay may kapangyarihan itong ipasara ang Icon Clinic sa Mandaluyong City.
Sa ngayon anya ay humirit ng limang araw sina Doctors Jose Jovito Mendiola at Samuel Eric Yapjuangco, ang mga doktor ng biktimang si Shiryl Saturnino upang makapagsumite ng kanilang affidavit.
Nakalinya na rin anya nilang kunan ng testimonya si Shiela Mae Anabe Deinla na kasama ni Saturnino nang magtungo ito sa clinic para sa kanyang cosmetic operation.
Si Saturnino ay nasawi matapos sumailalim sa liposuction, butt at breast augmentation.
“Titignan namin kung makita namin pagkatapos ng imbestigasyon na may negligence talaga ay irerekomenda natin yan for closure, kung ang local government ay sasabayan kami sa pag-iimbestiga at kumilos sila sa pamamagitan ng kanilang kapangyarihan ay puwede nilang ipasara yun, nasa prerogative naman nila kapag nakita nila na may violation.” Pahayag ni Sapitula
DOH
Samantala, handa ang DOH o Department of Health na imbestigahan ang pagkamatay ni Saturnino matapos sumalang sa aesthetic procedures o pagpapaayos sa tatlong bahagi ng kanyang katawan.
Ito ayon kay Health Spokesman Assistant Secretary Eric Tayag ay kapag mayroong naghain ng pormal na reklamo o mula sa pamilya ng biktima laban sa Icon Clinic.
Kasabay nito, ipinaabot ni Tayag ang pakikiramay sa pamilya ni Saturnino.
Bahagi ng pahayag ni DOH Asec. Eric Tayag
By Len Aguirre | Judith Larino | Ratsada Balita (Interview)
In Photo: Shiryl Saturnino