Kabilang ang Pilipinas sa first batch ng mga bansang paglalaanan ng COVID-19 vaccine ng Global Vaccine Alliance (Gavi).
Ito ang inanusyo ni United Kingdom Ambassador to the Philippines Daniel Pruce kung saan aabot sa halos sa 10 milyong doses ng bakuna na karamihan ay likha ng Oxford-AstraZeneca ang maaaring matanggap Pilipinas.
Ayon kay Pruce, isasagawa ang pamamahagi ng bakuna sa pamamagitan ng Covax Global Vaccines Facility.
Aniya, inaasahang masisimulan na ang pagdeliver sa mga naturang bakuna sa unang quarter ng 2021 o ngayong Pebrero, sakaling maipalabas na ang emergency use listing mula sa World Health Organization.
Sinabi ni Pruce, umaabot sa 548 million pounds o katumbas ng 752.3 million dollars na ang naibigay na pondo ng UK sa Covax advance market commitment para makatulong sa distribusyon ng mga COVID-19 vaccines sa 92 developing countries.