Pinalawig pa ni Pangulong Rodrigo Duterte ang termino ni Philippine National Police o PNP Chief Director General Ronald ‘Bato’ Dela Rosa.
Ayon sa Pangulo, patuloy siyang nagtitiwala at buo ang kanyang kumpiyansa sa pamumuno ni Dela Rosa sa Pambansang Pulisya.
May misyon pa aniya siya kay Dela Rosa partikular sa paglilinis sa PNP, pagpapatuloy ng war on drugs, paglaban sa terorismo at mga rebelde.
Dapat ay nagretiro na si Dela Rosa noong Enero 21 ngunit pinalawig ito ng Pangulo hanggang Abril ngayong taon.
Ngunit bago pa man dumating ang Abril ay inanunsyo na nga ng Pangulo ang extension ng termino ni Dela Rosa ngunit hindi pa tinukoy kung hanggang kailan.
Nagpasalamat naman si Dela Rosa sa buo pa ring pagtitiwala sa kanya ng Pangulo.
Ayon kay Dela Rosa, tuloy pa rin ang kanyang gagawing paglilingkod sa bayan hanggang sa panahon na naisin ng Pangulo.
Aniya, posibleng i-extend ng Pangulo ng isa pang taon ang kanyang termino o hanggang Enero 29, 2019 batay sa pinapayagan ng batas.
—-
