Pinasisilip ng isang consumer group sa Energy Regulatory Commission (ERC) ang ipinapataw na convenience fee ng Meralco kapag magbabayad ng electricity bill gamit ang kanilang mobile application.
Ayon kay Pete Ilagan, pangulo ng National Association of Electricity Consumers for Reforms Incorporated (NASECOR), maituturing na pang –abuso sa market power ng Meralco ang paniningil nito ng P47 na convinience fee.
Sinabi ni Ilagan, sa ilalim ng Electric Power Industry Reform Act (EPIRA) maaaring patawan ng parusa ang Meralco dahil hindi nila ito ipinagbigay alam sa ERC.
Aniya, dapat nagsumite muna ang Meralco ng aplikasyon sa ERC hinggil dito upang maidaan muna sa public hearing at magkaroon ng due process.
Kaugnay nito, nais namang pagpaliwanagin ni Energy Secretary Alfonso Cusi ang Meralco dahil sa tila mas pagiging pabigat ng kanilang convenience fee sa bulsa ng mga consumers.
