Posibleng ianunsyo na bukas, araw ng Lunes, ni Pang. Rodrigo Duterte ang magiging kapalit sa pwesto ng nagbitiw na si dating Philhealth Chief Ricardo Morales.
Ayon kay Sen. Bong Go, nabanggit na aniya ng Pangulo noong nakalipas na Biyernes ng madaling araw na meron na itong pinag-iisipan at napipisil na ipapalit kay General Morales, na maari umanong pangalanan na nito sa darating na August 31.
Paliwanag ni Go, nais ng Chief Executive na ang susunod na mamumuno sa Philhealth ay may kakayahang malinis ang ahensya mula sa taas pababa.
Nakita kasi aniya ni Pang. Duterte na hindi lamang mga matataas na opisyal ng Philhealth ang sangkot sa talamak na kurapsyon sa ahensya, kundi maging ang mga nasa baba rin.
Dagdag ng Senador, nararapat lamang na ang mauupong Philhealth President ay dapat na mayroong “willpower” at mayroong zero tolerance sa kurapsyon.
