Inihayag ng aktor na si Robin Padilla na nangunguna ngayon sa senatorial race, na si dating Chief Presidential Legal Counsel Atty. Salvador Panelo ang kanyang magiging katuwang sa oras na maupo na sa senado.
Sa Facebook post ni Padilla, sinabi nito na si Panelo ang kanyang magiging Legislative Consultant, Adviser at Mentor.
Hindi man aniya nagtagumpay si Panelo sa senatorial race, tiniyak nito na walang mababago sa kanilang adhikaing pagbabago.
Matatandaang kabilang sa plataporma ni Padilla ang pagsusulong ng Federalismo.
Aminado naman ang aktor na hindi magiging madali ang pagpapalit ng saligang batas.
Samantala, nagpasalamat naman si Panelo kay Padilla at nangakong tutulungan niya ito sa mga isinusulong nitong plataporma.
