Naiinip at naiirita na ang pamilya Marcos sa nakabinbing resolusyon sa election protest ni Dating Senador Ferdinand “Bongbong” Marcos Jr. laban kay Vice President Leni Robredo.
Ayon kay Ilocos Norte Governor Imee Marcos, walang ibang magawa ang kanilang pamilya kundi kaawaan ang kapatid na si Bongbong.
Marami anyang pinagdaraanang hirap ang kanilang pamilya sa poll protest ng kapatid dahil sa bagal ng pag-usad ng proseso.
Sa kabila nito, aminado ang gobernadora na hindi naman nakararamdam ng pagkadismaya o pagkainip si Bongbong at iginiit na wala itong balak tumakbo muli sa pagka-senador sa 2019 elections.
Hindi naman na anya kailangang sumabak muli sa pagka-senador ang nakababatang kapatid lalo’t ito naman ang tunay na nagwagi sa 2016 Vice Presidential Race at hindi si Robredo.
