Iginiit ni Senate President Pro Tempore Panfilo Lacson na kasinungalingan ang pahayag ni dating Congressman Mike Defensor na nasa kustodiya ng Philippine Marines si dating Technical Sgt. Orly Guteza.
Ayon kay Sen. Lacson, mismong si Philippine Marines Commandant Maj. Gen. Vincent Blanco III ang nagkumpirmang hindi kailanman napasailalim sa kustodiya ng Marines si Guteza.
Ibinunyag din ng senador na nakita ng Executive Judge ng Manila Regional Trial Court na hindi tugma ang pirma sa notarized affidavit ni Guteza sa pirma ng abogadong si Petchie Espera.
Inirekomenda ng hukom na isailalim sa preliminary investigation si Guteza at ang mga nagsumite ng kanyang affidavit para sa posibleng kasong falsification.
Binigyang-diin ni Sen. Lacson na bagaman nananatiling valid ang testimonya ni Guteza sa Blue Ribbon Committee, maaaring maapektuhan ng mga bagong pangyayari ang kredibilidad ng mga sinabi nito.
Nabatid na iprinisinta ni Senador Rodante Marcoleta si Guteza bilang surprise witness sa pagdinig ng Senate Blue Ribbon Committee noong Setyembre a-bente singko.
—Sa panulat ni John Riz Calata
