Nananatiling maayos ang pagtatrabaho ni Maria Rosario Vergeire bilang Officer-In-Charge ng Department of Health (DOH).
Ito ang sinabi ni Pangulong Ferdinand ‘Bongbong’ Marcos Junior, matapos tanungin kaugnay sa appointment ng OIC sa DOH at Department of National Defense (DND).
Ayon kay Pangulong Marcos, sumusunod lang sila sa proseso hangga’t wala pang naitatalagang kalihim sa dalawang departamento.
Tiniyak naman ng pangulo na maayos pa rin ang paggampan sa tungkulin ni Vergeire, lalo’t nasa gitna pa ng COVID-19 pandemic ang bansa.
Samantala, pagdating naman sa DND na kasalukuyang OIC si Undersecretary Jose Faustino Junior, sinabi ni PBBM na kuntento pa rin siya sa sitwasyon dito.
Mas mabuti aniya, giit ng pangulo na magtiis muna ang lahat lalo’t marami pang trabaho na kailangang gawin.
Matatandaang una rito, naglabas ng Memorandum Circular No. 3 ang Palasyo, kaugnay sa pagpapalawig ng awtoridad ng OICs hanggang December 2022, maliban kung may itinalaga o hinirang na kapalit.