Tinawag na pagsasayang ng pondo ng Korte Suprema ang pagtanggi ng Commission on Elections (COMELEC) na paganahin ang kakayahan ng VCMs o vote counting machines na mag isyu ng resibo sa eleksyon.
Binigyang diin ito sa desisyon ng Supreme Court na atasan ang COMELEC na paganahin ang VVPAT o voter verification paper audit trail ng VCM na inakda ni Associate Justice Marvic Leonen.
Batay sa desisyon ang itinatakda ng batas sa automated election na dapat ay mayroong kapabilidad ang gagamiting makina para makapag-isyu ng resibo dahil bahagi ito ng safeguards para matiyak ang malinis na eleksyon.
Ibig sabihin ay gumastos ang pamahalaan para matiyak na mailalagay ang VVPAT sa VCMs subalit hindi naman ito ginagamit ng COMELEC.
Binalewala ng Korte Suprema ang pangamba ng COMELEC na magamit sa vote buying ang resibo sa eleksyon dahil may mga paraan anila para maiwasan ito.
Nakapaloob sa desisyon ng Supreme Court na iiwan ng botante sa isang hiwalay na box ang resibong makukuha nila sa makina pagkatapos nila itong matignan.
By Len Aguirre