Itinuturing na hamon ng Philippine National Police (PNP) ang naging desisyon ng korte na agad palayain ang Human Rights Advocte na si Dr. Natividad Castro.
Si Castro na Secretary General ng grupong Karapatan sa rehiyon ng CARAGA ay inakusahang pinuno ng Communist Party of the Philippines (CPP) Health Bureau.
Ayon kay PNP Public Information Office Chief, P/BGen. Roderick Alba, iginagalang nila ang pasya ng hukuman subalit magsisilbing aral aniya ito sa kanila para higpitan at palakasin pa ang kanilang pag-uusig sa mga tukoy nang kalaban ng estado.
Magugunitang inaresto si Castro ng mga tauhan ng CARAGA at San Juan City PNP nuong Pebrero 20 matapos silbihan ng warrant of arrest dahil sa kasong kidnapping at serious illegal detention.
Kahapon, naglabas ng desisyon ang Bayugan City Regional Trial Court na nagbabasura sa mga isinampang kaso laban kay Dr. Castro at ipinag-utos sa PNP ang pagpapalaya rito.
Sa paglaya ni Castro, tahasan niyang tinawag na repugnant o walang respeto ang Pambansang Pulisya dahil sa kanilang ginawa sa kaniya. - ulat mula kay Jaymark Dagala (Patrol 9)