Muling magpupulong ang Inter-Agency Task Force on Emerging Infectious Diseases (IATF) kung palalawigin pa ang travel ban sa South Korea dahil sa epidemya ng 2019 coronavirus disease (COVID-19).
Ipinabatid ito sa DWIZ ni Department of Health (DOH) secretary Francisco Duque III matapos ipagbawal ang pagbiyahe at pagpapasok ng mga nagmumula sa Daegu City, Gyeongsang Province at Cheongdo County sa South Korea dahil sa mabilis na pagtaas ng kaso ng COVID-19 dito.
Sa kanilang monitoring, sinabi ni Duque na halos 50% pa ang itinaas ng bilang ng kaso ng COVID-19 sa mga nasabing lugar sa South Korea na sadya aniyang nakababahala na.
Napakabilis ng dagdag na bagong kaso, at ang Gyeongsang Province kasama ang Daegu City at ang Cheongdo County. In fact, kahapon, nung tinatalakay ito, mga 1,100 plus na ‘ung kaso. Nung isang araw lang, nasa 700 lang, so, tumalon ng 50% ang dagdag, so, mahirap ito. Kaya bukas magpupulong ulit para pag-usapan kung kailangang palawigin itong travel ban,” ani Duque.
Samantala, nananatiling nasa maayos na kondisyon ang mahigit 400 mga Pilipino na iniuwi sa bansa mula sa MV Diamond Princess sa Yokohama, Japan.
Ipinabatid ito sa DWIZ ni Duque sa gitna na rin nang regular nilang pagmonitor sa kondisyon ng mga nasabing Pinoy.
Muling tiniyak ni Duque ang mahigpit na pagbabantay ng hanggang 100 tauhan ng DOH habang naka-quarantine ang mga ito sa New Clark City sa Tarlac.
Tiwala si Duque na hindi makitaan ng anumang sintoms ang mga naturang Pinoy hanggang matapos ang quarantine.
Ako po ay tumatawag sa ating quarantine facility araw-araw para kumustahin ang ating mga kababayan d’yan po sa New Clark City, syempre kailangan ay atupagin natin ang kanilang mga pangangailangan,” ani Duque. —sa panayam ng Ratsada Balita
