Iimbestigahan na din ng mga eksperto mula sa Philippine General Hospital o PGH ang pagkamatay ng labing apat (14) na batang tinurukan ng anti-dengue vaccine na dengvaxia.
Ayon kay Health Undersecretary Enrique Domingo, ang mga batang edad siyam (9) hanggang labing isa (11) ay pawang nagmula sa Central Luzon, Southern Luzon at Metro Manila.
Aalamin aniya ng panel of experts kung ang pagkamatay ng mga bata ay may kaugnayan sa bakuna.
Ang PGH panel ay pangungunahan ng Pediatrics Department Head ng ospital na si Doctor Juliet Aguilar.
Una ng inianunsyo ni Health Secretary Francisco Duque na magko-convene ang panel ng dengue experts ng Department of Health o DOH upang repasuhin ang pinakabagong ebidensya hinggil sa dengvaxia na nakalap mula sa five-year observation period sa clinical trials.
