Inihayag ni Philippine National Police (PNP) Chief, P/Gen. Dionardo Carlos na malaking dagok o kawalan sa industriya ng iligal na droga ang pagkakasabat ng mahigit P340-M halaga shabu na aabot sa 50 kilo sa Quezon City.
Maliban dito, nasa halos P1-M halaga rin ng tanim at pinatuyong dahon ng marijuana ang winasak sa bahagi ng Kibungan, Benguet.
Gayundin ang halos mahigit 130 gramo ng shabu na nasabat sa isang drug suspek sa Taytay, Rizal na nagkakahalaga ng halos P920-K.
Bukod pa dito, walong gramo ng shabu na nagkakahalaga ng mahigit P54-K ang nasabat sa isang drug suspek na nasugatan matapos manlaban sa San Fernando City sa Pampanga.
Ayon kay Carlos, patuloy na paiigtingin ang mga operasyon ng kanilang ahensya kontra iligal na droga sa ilalim ng oplan double barrel finale version 2022. — sa panulat ni Angelica Doctolero
