Sasabak na ang Gilas Pilipinas at Australia Boomers sa second round ng FIBA World Cup Qualifiers.
Maghaharap ang dalawang koponan mamayang alas-4:30 ng hapon, oras sa Pilipinas, sa Margaret Court Arena, Melbourne, Australia.
Aminado ang Boomers na bagaman matatangkad ang kanilang mga player ay ang Pilipinas ang kanilang magiging pinakamatinding makakalaban sa Group B.
Nananatili ang Australia sa top spot ng Fiba Asia habang nasa 5th rank ang Pilipinas.
Anim na team mula sa FIBA Asia at Oceania bukod pa mga koponang magmumula sa FIBA Americas, Europe at Africa ang kailangang mag-qualify para sa gaganaping 2019 FIBA World Cup sa China.
‘Gilas players’
Handang-handa na si Kiefer Ravena at Kevin Alas na pangunahan ang Gilas Pilipinas sa laban ng koponan mamayang hapon kontra Australia para pagpapatuloy ng 2018 FIBA World Cup.
Ito ay matapos na mabigong makasama sa line up ang point guard ng Gilas na sina Jayson Castro at Jio Jalalon dahil sa injury.
Aminado si Kiefer na dadaan sila sa butas ng karayom lalo’t nasa ika-sampung puwesto sa world ranking ang Australia.
Gayunman, umaasa si Kiefer na masosorpresa nila sa laro ang koponan ng Australia at gagawin nila ang lahat gamit ang puso para manalo sa laban mamaya.
By Ralph Obina
