Isinusulong sa Kamara ni Deputy Speaker Fredenil Castro ang panukalang batas para buwagin ang Bureau of Customs o BOC.
Sa kanyang inihaing House Bill 7126, nais ni Castro na palitan ang BOC ng Customs Development Authority o CDA.
Sa ilalim nito, pangungunahan aniya ng Secretary of Finance ang Board of Directors ng CDA at magkakaroon ito ng General Manager bilang Vice Chairperson.
Kasama din ang commissioner ng Bureau Internal Revenue (BIR), director general ng National Economic and Development Authority (NEDA), kalihim ng Department of Trade and Industry (DTI), Department of Public Works and Highways (DPWH), Department of Environment and Natural Resources (DENR) at isang representative ng pribadong sektor na itatalaga ng Pangulo.
Giit ni Castro, bagaman malaki ang naiaambag ng BOC sa paglago ng ekonomiya at progreso ng bansa ay dapat nang matigil ang kultura ng korapsyon sa loob ng ahensya.
