Pinag-aaralan na ng Department of Labor and Employment ang pagbibigay ng P6,000 standard salary sa mga kasambahay.
Ayon kay Labor Secretary Silvestre Bello, inatasan na niya ang ibang opisyal nang ahensya na tingnan kung posibleng taasan ang sahod ng mga kasambahay sa buong bansa.
Ani Bello mungkahi pa lamang ito sa ngayon ngunit nakikita naman niyang makatwiran ang naturang halaga na dapat ibigay sa mga kasambahay.
Giit ni Bello kung hindi kaya ng isang employer ang magpasahod ng P6,000 kada buwan sa mga kasambahay, mas mabuti pang huwag na lamang silang kumuha ng katulong at sila na lamang ang gumawa ng kanilang mga gawaing bahay.
Sinabi ng kalihim na taun-taon naman ay nagkakaroon ng wage adjustment ngunit mas maganda aniya kung pare-parehas ang halaga ng sweldo ng mga kasambahay sa buong bansa.
