Nanindigan ang Department of Justice o DOJ na hindi forum shopping ang kanilang ginawang paghahain ng kaso laban sa mga pangunahing sangkot sa 6.4 billion pesos shabu shipment na nakalusot sa Bureau of Customs o BOC.
Iyan ang reaksyon ni Justice Secretary Menardo Guevarra makaraang ibasura ng Valenzuela City RTC o Regional Trial Court ang kasong transportation of illegal drugs na isinampa ng DOJ laban kina Customs Broker Mark Taguba, Richard Tan at iba pa.
Giit ni Guevarra, iba ang kasong isinampa nila sa Valenzuela RTC laban kina Taguba sa kasong drug importation na kanila namang isinampa sa Manila City Regional Trial Court.
Dahil dito, sinabi ni Guevarra na kanilang iaapela ang naturang desisyon ng Valenzuela court at kumpiyansa silang hindi ito makaaapekto sa inihain nilang kaso sa Manila RTC na kasalukuyan nang dinirinig.
—-
