Inatasan na ng pamunuan ng Philippine National Police o PNP ang lahat ng tanggapan nito sa Metro Manila na bantayang maigi ang mga nagsasagawa ng outdoor exercises sa kanilang nasasakupan.
Ito’y kasunod ng deklarasyon ng Metropolitan Manila Development Authority o MMDA na ipagbabawal muna ang pagsasagawa ng mga page-ehersisyo sa panahong nakapailalim ang NCR sa Enhanced Community Quarantine o ECQ.
Ayon kay PNP Chief P/Gen. Guillermo Eleazar, nararapat lamang ang karampatang aksyon mula sa Pulisya lalo pa’t itinuturing na muling high risk ang Pilipinas sa banta ng COVID-19.
Kasunod nito, sinabi ng PNP Chief na dapat paigtingin pa ng mga Pulis ang pagpapakalat ng impromasyon sa pamamagitan ng social media gayundin ang klarong pagpapaliwanag sa tuwing nagsasagawa sila ng Oplan Bandillo sa mga komunidad.
Sa huli, muling umapela ng pakikiisa si Eleazar sa mga taga-Metro Manila at matamang sundin ang mga ipinatutupad na panuntunan at ordinansa upang makaiwas sa pagkalat ng COVID-19 lalo’t nariyan na rin ang banta ng mas nakahahawang Delta variant.— ulat mula kay Jaymark Dagala (Patrol 9)