Pinayagan na ng Inter-Agency Task Force on Emerging Infectious Diseases (IATF-EID) ang pagbabalik operasyon ng mga Philippine Offshore Gaming Operators (POGO) sa gitna ng umiiral na enhanced community quarantine (ECQ).
Ito ang inihayag ng Philippine Amusement and Gaming Corporation (PAGCOR) bagama’t partial operations lamang.
Ayon kay PAGCOR Chairman and CEO Andrea Domingo, tanging 30% lamang ng kabuuang work force ng mga POGO ang papayagang makabalik muli sa trabaho.
Sinabi ni Domingo, kinakailangan ding matiyak na maipatutupad at masusunod ang mga hakbang para maiwasan ang pagkahawa sa sakit tulad ng physical distancing sa lugar ng trabaho.
Dagdag ni Domingo, naglatag din aniya sila ng kondisyon kung saan dapat bayaran ng mga POGO companies ang buong sahod ng kanilang mga Pilipinong manggagawa sa buwan ng Abril kahit hindi nakapag-report sa trabaho.
Inaasahang magbubukas nang muli ang ilang mga POGO companies matapos na maisapinal nila ang mga kinakailangang dokumento at pagsasagawa ng disinfection sa mga kanilang mga opisina.