Pag iisyu ng ECC ng DENR muling ibinalik sa mga director at Regional Dir. ng EMB

Sinuspendi ni DENR Secretary Roy Cimatu ang isang Department Order na inisyu ni dating Secretary Gina Lopez kaugnay sa pag-iisyu ng ECC o Environmental Compliance Certificate.

Sa bagong Department Order No. 2017-2018 na inisyu noong July 3 ni Cimatu,  ibinabalik na ang pag-iisyu ng ECC sa  Director at Regional Director ng EMB o Environmental Management Bureau ng DENR.

Binigyang diin ni Cimatu na ang kanyang direktiba ay bilang tugon sa kautusan ni Pangulong Rodrigo Duterte na mabawasan ang red tape sa burukrasya at ang buong pamahalaan ay makatugon kaagad sa pangangailangan ng mamamayan.

Matatandaang nagpalabas ng Department Order si Lopez na ipinagbawal sa mga Director at Regional Director ng EMB ang pag-iisyu ng ECC sa mga kumpanyang nais kumuha ng permit lalo na kung Environmentally Critical Projects (ECPS) at Non-ECPS at sa halip, ang kalihim lamang ang magbibigay ng ECC matapos irekomenda ng EMB Director at undersecretary for legal affairs.

By: Meann Tanbio

Comments

comments