Magsisimula na sa unang araw ng Disyembre ang paglalapat ng panuntunang “No Work, No Pay” para sa hindi pa bakunadong empleyado na tumatangging sumailalim sa mandatory COVID-19 regular testing.
Sa online briefing, sinabi ni Labor Assistant Secretary Teresita Cucueco na maaring magtrabaho on-site ang empleyadong hindi pa nababakunahan, ngunit kailangan nitong gumastos para sa kaniyang regular COVID-19 test.
Nakapaloob sa resolusyong inilabas ng IATF na may petsang Nobyembre 12 at 18 na inuutusan ang lahat ng mga establisimyento at employer na hilingin sa kani-kanilang mga on-site employees na magpabakuna.
Paliwanag ng IATF, pagsapit ng unang araw ng Disyembre, lahat ng hindi pa nabakunahang manggagawa ay sasailalim sa regular RT-PCR testing isang beses bawat dalawang linggo, upang makapagtrabaho on-site.
Maari ring mag-pa-antigen ang mga ito kung hindi sapat ang kapasidad ng RT-PCR.
Dagdag ni Cucueco, hindi na maglalabas ng labor advisory ang DOLE sa ipinatupad na patakaran ng IATF.—mula sa panulat ni Joana Luna
