Naghain ng graft charges si Samahan ng Industriyang Agrikultura o SINAG President Rosendo So laban kay National Food Authority (NFA) Administrator Jason Aquino at iba pang opisyal.
Dahil ito sa pag-divert umano sa 5.1 billion peso fund ng NFA na para sana sa price at supply stabilization ng bigas at mais.
Sa labindalawang pahinang reklamo, kinuwestyon din ni So sina Aquino at Gerry Ambrosio, Manager ng NFA Accounting Services Department kung saan napunta ang nasabing pondo.
Ayon kay So, Disyembre 22 noong 2016 nang lagdaan ni Pangulong Rodrigo Duterte ang RA 10924 para sa alokasyon ng 5.1 billion pesos sa NFA na gagamitin upang mapanatiling sapat at stable ang presyo ng bigas at mais.
Samantala, nilinaw naman ni NFA Spokesman Rex Estoperez na bagaman hindi pa nila natatanggap ang kopya ng reklamo, handa naman nila itong sagutin.
—-
