Nasa full alert status na ang buong puwersa ng National Capital Region Police Office (NCRPO) upang matiyak ang seguridad ng paggunita sa ika-30 anibersaryo ng EDSA People Power 1 bukas, Pebrero 25.
Ibig sabihin, kanselado na ang leave at day off ng mga pulis sa Metro Manila at naka-standby na ang buong puwersa ng NCRPO para sa deployment.
Ayon kay NCRPO Chief Police Director Joel Pagdilao, kasado na ang security at public safety plan na ipapatupad bukas.
Tiniyak nito na sapat ang bilang ng mga pulis na ide-deploy para sa security, crowd control, emergency response at traffic management katuwang ang iba’t ibang ahensya ng gobyerno.
Hindi din aniya mapapabayaan ang normal na police operation sa iba’t ibang bahagi ng Metro Manila kaya hindi makakapagsamantala ang mga kawatan.
By Jonathan Andal
