Umapela sa Department of Health (DOH) si Capas, Tarlac Mayor Reynaldo Catacutan na maghanap ng iba pang lugar na maaaring gamitin bilang quarantine facility maliban sa New clark City.
Ito ay matapos na mapag-alamang dadalhin sa NCC ang halos 500 mga Pilipino mula Diamond Princess cruise ship sa Japan na inaasahang darating sa Martes, Pebrero 25.
Ayon kay Catacutan, nakiusap siya kay Health Secretary Francisco Duque III na kung maaari aniya ay hatiin ang bilang ng nabanggit ng mga Pilipino at hindi ilagay lahat sa NCC.
Aniya, sa ganitong paraan din makikita kung nakahanda ang ibang rehiyon o lalawigan, sakaling magkaroon ng coronavirus disease outbreak sa bansa.
Dagdag ni Catacutan, tiniyak naman sa kaniya ni Secretary Duque na inihahanda rin ang Fort Magsaysay sa Nueva Ecija na posibleng gamitin din bilang quarantine facility para sa susunod na batch ng mga irerepatriate na mga Pilipino.