Muling bubuksan ang pagdinig ng House Committee on Justice sa isyu ng illegal drug trade sa New Bilibid Prisons (NBP) kapag lumutang na ang dating driver ni Senador Leila de Lima.
Ipinabatid ito ni Committee Chair Reynaldo Umali kahit pa tinapos na nila ang imbestigasyon sa nasabing usapin kahapon.
Kagabi ay nagpalabas na ng contempt order ang Kamara laban kay Ronnie Dayan na mahigpit nang pinatutugis sa mga awtoridad.
Bahagi ng pahayag ni Congressman Reynaldo Umali
Kaugnay nito, sinabi din ni Umali na sapat na ang mga nakalap na impormasyon ng kamara sa isyu ng illegal drug trade sa Bilibid..
Ito’y kayat uubra nang makasuhan ang mga taong nasa likod ng drug trade sa national penitentiary.
Magugunitang unang humarap kahapon sa Justice Committee hearing si NBP high profile inmate Jaybee Sebastian na itinuturong may hawak ng operasyon ng illegal drugs sa loob ng NBP.
Sa panig naman ng DOJ, binigyang diin sa DWIZ ni Justice Secretary Vitaliano Aguirre na nais niyang higit pang maging matibay ang mga testimonial at documentary evidences na hawak nila para patunayang sangkot talaga sa NBP drug trade ang dating Justice Secretary Leila de Lima.
Kailangan pa aniya nilang palakasin ang documentary evidence tulad nang pagkabit ng mga bank deposit na bilyun-bilyon sa illegal transaction ni De Lima at kanyang mga kasamahan.
Bahagi ng pahayag ni DOJ Secretary Vitaliano Aguirre
By Judith Larino | Karambola