Tinabla ng korte suprema ang hirit ng nakakulong na negosyanteng si Janet Lim Napoles na makalaya pansamantala sa kaniyang piitan.
Ayon sa 2nd Division ng high tribunal, binigyang diin ni Associate Justice Mario Lopez na hindi dapat pagbigyan ang hirit ni Napoles dahil sentesyado na ito sa kasong plunder na isang capital offense.
Una rito, hiniling ng kampo ni Napoles na palayain siya pansamantala dahil nalalagay sa alanganin ang kaniyang kalusugan bilang diabetiko sa loob ng bilangguan lalo na’t malaki pa rin ang banta ng COVID-19.
Bagama’t naghain naman ng mga kinakailangang dokumento si Napoles bilang patunay sa kaniyang mga iniindang karamdaman, nanindigan ang korte suprema na hindi pa rin dapat makalaya kahit pa pansamantala si Napoles.
Magugunitang si Napoles ang itinuturong utak ng kontrobersyal na pork barrel scam noong 2013 kung saan, kasama niyang nakakulong ang ilang matataas na opisyal ng pamalaan na karamiha’y mambabatas.
