Tuluyan nang sinibak sa serbisyo ang Pulis na ambulance driver ng PNP health service at suma-sideline na fixer sa mga aplikante sa pagkaPulis.
Ayon kay Philippine National Police o PNP Chief Gen. Guillermo Eleazar, epektibo noong Lunes, Hunyo 14 ang pagsibak sa serbisyo kay P/Ssgt. Joel Zalun Bunagan bunsod ng kasong grave misconduct dahil sa ginawa nitong pangingikil.
Mayo 31 nang maaresto si Bunagan ng mga tauhan ng PNP Integrity Monitoring and Enforcement Group o IMEG sa ikinasang entrapment operation sa Camarin, Caloocan City matapos manghingi ng P100K sa isang aplikante kapalit ng pagpasok nito sa PNP.
Bago iyan, naaresto na rin ng IMEG sa kaparehong kaso si Bunagan noong Abril 2020 sa Novaliches, Quezon City subalit nakapagpiyansa kaya nakalaya.
Kasalukuyang nahaharap si Bunagan sa mga kasong paglabag sa Republic Act 11032 o ang Ease of Doing Business and Efficient Government Service Act at Republic Act 3019 o Anti-Graft and Corrupt Practices Act .
Babala pa ng PNP Chief sa mga kasabwat ni Bunagan o sa iba pang mga tiwaling Pulis na may katulad na aktibidad na hindi sila tatantanan hangga’t hindi sila nauubos sa kanilang organisasyon.