Inanunsyo ng Department of Transportation na mag-aalok sila ng libreng sakay sa Light Rail Transit Lines 1 at 2, at Metro Rail Transit Line 3, sa gitna ng pananalasa ng bagyong Uwan.
Epektibo ang libreng sakay sa mga linya ng LRT at MRT buong araw, ngayong Nobyembre a-diyes hanggang bukas, Nobyembre 11.
Bukod dito, magbibigay rin ng libreng bus rides ang Office of the President, Philippine Coast Guard, Philippine Ports Authority, at tanggapan ni Senador Erwin Tulfo ngayong araw, sa ilang piling ruta kabilang ang:
Quiapo hanggang Fairview; Quiapo hanggang Angono; Lawton hanggang Alabang; Roxas Boulevard hanggang Sucat; at Taft hanggang Cubao.
Inalis na rin ng PPA ang mga roll-on o roll-off terminal fees sa mga sasakyang may dalang rescue equipment at relief goods para sa mga apektado ng bagyo.
Habang inalis na rin ng mga local airline ang cargo fees sa mga nagpapadala ng tulong sa mga apektadong residente.
Ipinag-utos naman ni Acting Transportation Secretary Giovanni Lopez sa Toll Regulatory Board na huwag nang pagbayarin ng toll fees ang mga sasakyang ginagamit sa emergency at rescue operations.
