Hihingan ng paliwanag ng liderato ng Philippine National Police (PNP) ang mga tauhan nitong umaresto sa dating ministro ng Iglesia ni Cristo na si Lowell Menorca.
Ito’y bilang bahagi ng isinasagawa nilang imbestigasyon sa nangyaring pagsisilbi ng arrest warrant kay Menorca ng mga operatiba ng Manila Police District (MPD).
Ayon kay C/Supt. Wilben Mayor, tagapagsalita ng PNP, may sinusunod silang operational procedures sa pagsisilbi ng arrest warrant kabilang na ang maayos na pagpapakilala ng mga arresting officer at pagpapakita ng tamang identification.
Maaari ring isilbi ang warrant of arrest anumang araw o oras nang sino mang law enforcer at dapat basahan ng Miranda Doctrine ang taong inaaresto upang malaman ang kanyang mga karapatan.
Hindi dapat gumamit ng anumang dahas ang isang arresting officer kung hindi naman delikado ang aarestuhin ngunit maaari naman itong posasan bilang bahagi ng security protocol at kinakailangan ding dalhin sa himpilan ng pulisya ang naarestong suspek para sa tamang documentation.
Dagdag pa ni Mayor, nais din nilang maliwanagan sa usapin ng pagdadala ng baril umano ng mga nakasibilyang pulis dahil mahigpit itong ipinagbabawal alinsunod sa itinatakda ng Omnibus Election Code maliban sa mga miyembro ng CIDG at Anti Illegal Drugs Group.
By Jaymark Dagala | Jonathan Andal