Posibleng madagdagan pa ang bilang ng mga masisibak na miyembro ng Quezon City Police District o QCPD.
Pahayag ito ni Senior Supt. Guillermo Eleazar, Hepe ng QCPD matapos kumpirmahin ang pagsibak niya sa 88 pulis ng QCPD na miyembro ng District Anti-Illegal Drug Special Operations Task Group o DAID-SOTG at Anti Illegal Drugs Unit ng Station 6 sa Batasan.
Ayon kay Eleazar, isinasalang na ngayon sa imbestigasyon ang 88 pulis upang mabatid kung sinu-sino ang mayroong kinalaman sa drug operations at sa pagre-recycle ng mga nakukumpiskang illegal drugs.
Matatandaan na napatay sa police operations ang isa sa mga lider ng DAID-SOTG na si Senior Inspector Ramon Castillo matapos itong magbenta ng shabu sa isang undercover agent ng QCPD.
Bahagi ng pahayag ni Senior Supt. Guillermo Eleazar
Murder cases
Inamin naman ng Quezon City Police District na tumaas ang insidente ng murder sa lungsod.
Ayon kay Senior Supt. Guillermo Eleazar, hepe ng QCPD, kasama sa talaan ng murder cases ang mga labi na natatagpuan sa lungsod na hanggang ngayon ay hindi pa matukoy ang suspects.
Gayunman, maliban sa murder, lahat anya ng klase ng krimen tulad ng carnapping, motornapping, homicide, theft robbery at iba pa ay bumaba na.
Bahagi ng pahayag ni Senior Supt. Guillermo Eleazar
Kasabay nito ay nagpahiwatig ng sama ng loob si Eleazar dahil mas madalas na laman ng balita ang mga drug suspects na namamatay sa drug operations.
Hindi anya nababanggit sa mga balita na mula nang simulan nila ang Oplan Double Barrel noong July 1 ay umaabot na sa mahigit 400 ang naaresto nilang drug suspects na buhay at 31 lamang ang nasawi dahil lumaban.
Bahagi ng pahayag ni Senior Supt. Guillermo Eleazar
By Len Aguirre | Ratsada Balita