Naharang ng Bureau of Customs (BOC) ang dalawang package mula Poland na naglalaman ng itim na langgam na ayon sa Department of Environment and Natural Resources (DENR) ay may masamang epekto sa kapaligiran kapag pinakawalan.
Ayon sa BOC, 375 buhay na black ants na nakasilid sa isang glass test tube na may nutrient solution ang dumating noong Disyembre at Enero.
Ang nasabing bagahe ay nakapangalan sa isang Shin Yap bilang importer at consignee.
Inihayag ni DENR-Enforcement Division Surveillance and Intelligence Section Chief Maricar Puno-Sanchez na pansamantalang inilagay ang mga langgam sa aquarium kung saan magtatayo ang mga ito ng kolonya.
Nakatakda namang i-euthanize ang mga naturang hayop sa sandaling makumpleto ang legal process.
