Papayagan na ng Bureau of Immigration (BI) ang pag-re-renew ng mga re-entry permits upon arrival sa bansa ng mga dayuhan o foreigners.
Ayon kay BI Commissioner Jaime Morente, kailangan lamang na ipakita ng mga dayuhan sa mga immigration officer ang kanilang resibo bilang katunayan na sila’y nagbayad para sa re-entry permit.
Dagdag pa ni Morente, ang naturang hakbang ay para bigyang daan ang mas mabilis na pagpasok ng mga dayuhan na may existing valid visa na kamakailan ay hindi pinayagang makapasok sa bansa dahil sa umiiral na travel restriction.
Sa naturang polisiya, kabilang sa mga tinukoy na foreigners o dayuhan ay ang mga permanent residents sa Pilipinas na may working at student visa.
