Isinusulong ngayon sa Senado ang panukalang batas na magbibigay ng karapatan sa mga asawa ng Overseas Filipino Worker (OFW) ng parental leave, discount sa tuition, medical, at iba pang pangunahing pangangailangan.
Layon ng Senate Bill No. 164 na mabigyan ng pribilehiyo ang mga asawa ng OFW ng katulad sa solo parent.
Ayon kay Sen. Risa Hontiveros, naghain ng nasabing panukala, madalas na matagal bago umuwi ang isang OFW, kaya naman aniya ang asawang naiwan sa Pilipinas ang mag-isang nagpapalaki sa kanilang anak.
Ani Hontiveros malaki ang sakripisyo ng isang magulang na OFW kaya’t dapat ay may suporta rin na nakukuha ang pamilya nito mula sa gobyerno.
Dagdag ng senadora, isa ang naturang hakbang para mabigyan ng pagkilala ng gobyerno ang sakripisyo at ambag sa ekonomiya ng mga OFW.
