Tiniyak ni Senate Committee on Finance Chairman Sherwin Gatchalian na walang sasantuhin ang Senado kahit pa mga kapwa mambabatas at pulitiko sa isinasagawang imbestigasyon sa mga palpak at maanomalya umanong flood control projects.
Ito’y sa gitna na rin ng sinasabing pagkakasangkot ng ilang mambabatas na nakinabang at ginawang “gatasan” ang kontrobersyal na mga proyekto.
Tinawag ni Senador Gatchalian na “garapalan” at “harap-harapang pagnanakaw sa pera ng taumbayan” ang nangyayaring katiwalian sa mga flood control projects, na ang ilan ay nagmistulang guni-guni o ghost project, lalo na sa Bulacan.
Kaugnay nito, nanawagan ang senador sa mga gobernador at opisyal na makipag-ugnayan sa Senate Blue Ribbon Committee sakaling may nalalaman tungkol sa nasabing korapsyon.
