Naisumite na ng Deparment of Budget and Management (DBM) sa Office of the President ang memorandum para sa pondo na ilalaan ng gobyerno para sa Laguna at Bataan na nakasailalim rin sa Enhanced Community Quarantine o ECQ.
Ayon kay DBM Assistant Secretary Rolando Toledo,hinihintay na lamang nila ang pag apruba ni Pangulong Rodrigo Duterte para sa P700 milyon na pondo para sa ayuda sa Bataan.
Nauna na ring naisumite sa tanggapan ng Pangulo ang P2.715 bilyon na ayuda para naman sa mga residente ng Laguna.
Sinabi pa ni Toledo na sa oras na maaprubahan ito ay agad naman itong ibibigay sa mga LGU ng Bataan at Laguna.
Ipinatutupad ang ECQ sa Laguna mula Agosto 6 hanggang 15 habang umiiral naman ang ECQ sa Bataan mula Agosto 8 hanggang 22.—sa panulat ni Hya Ludivico
