Nire-respeto ng McCann Worldgroup Philippines ang desisyon ng DOT o Department of Tourism na kanselahin ang kanilang kontrata sa kagawaran.
Sa ipinalabas na kalatas ng McCann, bagaman kanilang ikinalulungkot ang naging pasya ng DOT, kanilang hiniling na mabigyan ang usapin ng makatwirang solusyon.
Gayunman, nagpapasalamat ang McCann sa oportunidad na ibinigay sa kanila ng ahensya para makapagsilbi.
Matatandaang inanunsyo noong Huwebes ng DOT ang pagkansela ng kontrata ng McCann matapos na makatanggap ng batikos ang kanilang ginawang campaign ad dahil sa pagkakapareha nito sa isang patalastas din sa South Africa.
Pagkansela ng kontrata ng DOT sa McCann ikinalugod ni Sen. Binay
Ikinalugod ni Senate Committee on Tourism Chairman Nancy Binay ang desisyon ng DOT o Department of Tourism na kanselahin ang kontrata ng McCann Worldgroup Philippines sa ahensya.
Ayon kay Binay, isang magandang hakbang ang ginawa ng DOT na nagpapakitang nakikinig ito sa opinyon at sentimyento ng kanilang mga stake holders.
Kasunod nito, umaasa ang senadora na hindi na mauulit pa ang katulad na kontrobersya kaugnay ng ginawang campaign ad ng McCann para sa DOT.
Una nang iginiit ni Binay na dapat pagmultahin ang mga ad agency na hindi nagbibigay ng orihinal na konsepto dahil aniya nakokompromiso dito ang integridad ng isang ahensiya ng pamahalaan.
By Krista De Dios | With Report from Cely Bueno
