Nais ni Senate Majority Leader Juan Miguel Zubiri na matanggal sa puwesto si Philippine Ambassador to Brazil Marichu Mauro.
Ito ay matapos masangkot ang opisyal sa insidente ng pangmamaltrato sa kanyang Filipinang kasambahay sa kanyang diplomatic residence sa Brazil.
Ayon kay Zubiri, ilan sa mga maaaring isampang kaso kay Mauro ay paglabag sa Republic Act number 10361 o batas kasambahay, revised penal code at republic act number 6713 o code of conduct and ethical standards for public officials and employees.
Sinabi ni Zubiri, tiniyak na ng anak ng kasambahay ni mauro na handa ang kanyang ina na maghain ng affidavit hinggil sa buong detalye ng naranasan nitong pang-aabuso mula sa opisyal.
Binigyang diin ng senador, kinakailangang maayos ang nadungisang imahe ng foreign service ng Pilipinas.
Mangyayari lamang aniya ito kung magkapagpapatupad ng mabilis na aksyon at pagpapataw ng mabigat na parusa laban kay Mauro.