Plano ng Land Transportation Franchising and Regulatory Board na obligahin ang lahat ng Public Utility Vehicle drivers at conductors na sumailalim sa dalawang araw na retraining para sa pag-renew ng prangkisa.
Kasama rito ang psychological profiling, edukasyon sa road safety, at first-aid training na nagkakahalaga ng hanggang P2,000 kada participant.
Kaugnay nito, idinepensa naman ni LTFRB Chairman Teofilo Guadiz ang nasabing singil.
Giit ni Chairman Guadiz, layunin ng programa na bawasan ang mga aksidente at insidente ng road rage sa pamamagitan ng pagsuri sa mental at emosyonal na tugon ng mga driver sa tensyonadong sitwasyon gamit ang simulation tests.
Hinihikayat din ang transport operators at cooperatives na magtayo ng sariling driver academies para mabawasan ang gastos.
Unang ipatutupad ang programa sa mga bus at truck driver sa metro manila at unti-unting palalawakin sa buong bansa sa loob ng tatlong taon.—sa panulat ni Kat Gonzales
