Tahasang inakusahan ng Malakanyang si Sen. Manny Pacquiao na namumulitika lamang matapos akusahan nito ang Department of Health na pinakatiwaling ahensya ng pamahalaan.
Ayon kay Presidential Spokesman Harry Roque, posibleng absent o nasa ibang bagay nakatuon ang atensyon ni Pacquiao nang i-ulat ni Health Secretary Francisco Duque III sa senado kung paano nila ginagastos ang pondo para sa COVID-19 response.
Sinabi ni Roque, dumaan sa masusing pagkilatis ng mga senador si Duque hinggil sa usapin subalit hindi naman ito nakitaan ng matibay na ebidensya para kasuhan sa korte.
Paggunita pa ni Roque, mismong si Pacquiao ay wala ring masabi laban kay Duque noong panahong ginigisa ito sa budget hearing ng senado.
Dahil dito, sinabi ni Roque na hahayaan na lang nila ang tao ang magpasya kung sino ang karapat-dapat maluklok sa puwesto pagsapit ng darating na halalan sa susunod na taon. —ulat mula kay Patrol 17 Jopel Pelenio
