Hinimok ng Malacañang si Chief Justice on-leave Maria Lourdes Sereno na isaalang–alang ang hinaing ng mga manggagawa ng hudikatura sa kanyang pagpapasya kung pakikinggan ang panawagan na magbitiw na siya sa puwesto.
Kasunod na rin ito ng binasang manifesto ng mga grupo ng mga hukom sa buong bansa at empleyado ng hudikatura na humihiling ng resignation ni Sereno kahapon.
Ayon kay Presidential Spokesperson Harry Roque, bagama’t hindi mapipilit at nasa pagpapasiya na ni Sereno kung magbibitiw ito sa tungkulin ay umaasa pa rin silang ikokonsidera ng punong mahistrado ang panawagan.
Malinaw na aniya na dumarami na ang nananawagan ng kanyang pagbaba sa puwesto kabilang na ang mga hukom ng mga korte at maging ang mga kapwa niya mahistrado ay hiniling na ang kanyang pag-indefinite leave.
