Tiniyak ng Philippine National Police (PNP) ang buong suporta kay incoming PNP Chief Director Oscar Albayalde at maging sa papalit sa kanya sa National Capital Region Police (NCRPO).
Ayon kay Chief Superintendent John Bulalacao, Spokesman ng PNP, gamay na ng mga pulis ang istilo ng pamamalakad ni Albayalde na bagamat may pagka-istrikto aniya ay para itong isang ama sa kanyang mga pulis.
“He is fatherly, talagang he gives instruction na para bang ang treatment niya doon sa inuutusan niya ay kanyang mga anak kaya na-a-achieve namin ‘yung aming purpose, ‘yung mission ng Philippine National Police dito sa NCRPO, we welcome his appointment as next PNP Chief, isa rin sa mga characters nito ni General Albayalde is he is also god fearing.” Ani Bulalacao
Tinukoy ni Bulalacao ang subok na aniyang track record ni Albayalde na titiyak sa patuloy na pagpapatupad ng mga polisiya ng gobyerno para na rin sa kaayusan at kaligtasan ng publiko.
Sa panayam ng DWIZ, sinabi rin ni QCPD Director Chief Superintendent Guillermo Eleazar na karapat-dapat sa naturang posisyon si Albayalde na isang dedikado at mabuting halimbawa ng pagiging isang pinuno.
Patunay aniya nito ay ang pag-iikot ni Albayalde kahit gabi upang tiyaking laging gising at alerto ang mga pulis sa bawat istasyon.
Naniniwala si Eleazar na kakayanin ni Albayalde na ipatupad ang disiplinang ipinairal nito sa lahat ng mga pulis sa buong bansa.
“Siya po ay leading by example, hindi niya po ipapagawa sa mga tao niya ang hindi niya kayang gawin, in fact ang kanyang pag-iinspect na kanyang ginagawa ay talagang napapanahon at nakitaan natin ng magandang resulta itong inspection sa gabi sa mga patulog-tulog na talaga namang dapat hindi ginagawa.” Pahayag ni Eleazar
Samantala ipinaabot naman ni Defense Secretary Delfin Lorenzana ang pagbati kay Albayalde na aniya’y kilala niyang professional at no non sense police officer.
Naniniwala aniya siyang magiging maayos at magaling na hepe ng PNP si Albayalde.
Kinumpirma din ni outgoing PNP Chief Ronald ‘Bato’ Dela Rosa na siya mismo ang nagrekomenda kay Albayalde na papalit sa kanya sa posisyon.
PNP chief Ronald Dela Rosa, kinumpirmang siya ang nag-rekomenda kay NCRPO chief Oscar Albayalde para maging susunod na hepe ng PNP @dwiz882 pic.twitter.com/D2ca58kBWx
— Jonathan Andal (@JonathanAndal_) April 6, 2018
(Balitang Todong Lakas Interview / Ratsada Balita Interview )
